去年iPhone 6刮起超級炒賣颱風後，智能科技市場沉靜一時，上月初Apple Watch公布價格後，本港反應一般似乎未有熱烈討論。今個星期五，Samsung Galaxy S6 Edge開賣，Apple Watch亦在同日開始接受預訂，果迷、「三叔」粉絲又有排興奮。

　　不過，有旺角手機店就直言Apple Watch和S6 Edge都不看好，「炒唔起，兩隻都蝕錢！」

　　果迷引頸以待的新產品Apple Watch今個星期五下午3點後就在官網接受預訂，月尾24日正式開賣。不過果迷早前都只是一直望到電腦圖片，未有真實貨品見到，個心當然有點「唔係咁爽」。外國網站就流出疑似「真身」照片，包括Apple Watch包裝和錶帶包裝。

　　網上圖片

　　從9to5mac上載的照片見到，相信是「WATCH」的42mm不鏽鋼錶殼配鋼織手環，Apple Watch的包裝用上一貫全白硬盒，手錶有個硬圈承托。另外有一張是額外錶帶的包裝。

　　另外一批照片，相信是蘋果商店展示用的設置。

　　網上圖片

　　Apple Watch香港售價亦在官網上列出，其中最平的是「WATCH SPORT」，有10種不同款式，售價由$2,728至$3,088；較華麗的「WATCH」就有20款，售$4,288至$8,588不等。

　　最受矚目的當然是「WATCH EDITION」，以18K玫瑰金、黃金製成錶款，共有8款選擇，當中最貴一款是38mm 18K黃金/玫瑰金配時尚圈扣錶帶，盛惠12.98萬元。「EDITION」入面，最平的都要7.88萬，18K金錶殼配運動錶帶。

　　至於Samsung全新推出的S6 Edge，就會在今個星期五開始在全球多個城市推出，包括香港。手機主打是連兩個機身側面都利用成觸碰屏幕，擴展可用面積，即使手機反轉放於枱上，都可以輕鬆見到對方聯繫。手機有4種顏色選擇，其中「樹色」(綠) 較創新。

　　另外手機的前後置鏡頭會增加解像度，賣點是擁有1.9特大光圈，另外更聲稱擁有高電池續航能力，亦內置無線充電。

　　兩大手機陣營對壘，究竟邊隻炒得起？有旺角先達手機店負責人就對本網表示，兩款新智能產品都「唔睇好」，直言「兩隻都冇人問、兩隻都會蝕錢，三星就更加，一定會蝕！」

　　對於Apple Watch，他估計最平的「WATCH SPORT」會有最多人預訂，不過就算出貨都會蝕100至200元，「一定會蝕，啲人搏有高價（炒賣）咋嘛，或者當係儲信用卡積分，蝕一、兩百蚊咪一樣。」