「不能留芳百世，都要遺臭萬年」，特朗普做到了，上任首日就創了多項歷史，演說中負面字最多，指媒體是「地球上最不誠實的人」，歌手議員杯葛之多也創了先河，幾百萬人上街反他，此種「號召能力」有誰能及?

 

　　中美建交基於「一個中國」原則，特朗普竟揚言不一定支持一中原則，還火上加油說與北極熊俄羅斯有偈傾，看來並非隨口講，仲擺明車馬要同中國打貿易戰，此為問題所在，國際路線圖好亂也。

 

　　膳源又靜靜雞熱身

 

　　拉回本地魚缸尋寶更有建設性，筆者見到隻半新股膳源控股(1632)又靜靜雞見熱身，連升第7日，昨日曾見11元，又再刷新12月28日以來新高。集團去年11月29日以招股價2元上市，「7日升7倍」河粉股膳源，捧場客勁過天王巨星，一口氣升上17元多後唞咗一排，最近成交又突然大咗，其實，中資入股麥當勞明顯係誘因，市場聯想可能入股香港飲食集團，河粉股係香港出名做越南嘢，有機睇中唔出奇，所以不妨第二春炒上，仲有六成水位，唔貪心執兩成發新年財，都係良好願望。

 

　　技術形態而言，股價由17.5元調整至約9元水平，調整幅度逾五成，目前在10天線水平企穩，料貨源歸邊情況下，有利重新炒上，不妨小注買入。集團截至去年9月底半年業績虧損363萬元，預期上市集資資金主要用作開設餐廳分店，業績可望改善。目標12元，止蝕9元。

 

　　古小龍