網上瘋傳一段短片，網民在元朗怡豐花園對開看見一名年約3歲的男童，懷疑跟祖父一起吸煙，祖孫倆蹲在路上分持香煙，但男童未有吸入。街坊行經發現質問祖父：「佢食左好多啖。」又斥責老翁：「佢咁細個比佢食煙？」

    樓主上載約13秒好短片，標題為：有個目測3歲小朋友係元朗同(呀爺/呀公)一齊食煙，並呼籲網民：「麻煩大家廣傳出去，希望比到佢父母睇到！」

帖文指：

    啱啱係怡豐花園對出見到個目測3歲既小朋友同(呀爺/呀公)行緊，跟住(呀爺/呀公)手拎住支煙同時口又有一支。

    咁我覺得好奇怪就係後面望多咗幾眼。

    點知見到個細路做手勢叫(呀爺/呀公)比佢 ，指住支煙再指住自己個口。

    跟住就望住細路仔好純熟用食指中指夾住支煙係到啜咗2、3啖 ，佢(呀爺/呀公)就再同個細佬行前踎喺樹邊一齊係到食。

    我一見到然後我就即刻行上前，旁邊有其他家長都見到就出聲叫佢唔好咁樣俾個小朋友食！咁細個！

    點知佢(呀爺/呀公)仲笑笑口話比佢玩下姐！但好多人已經見到佢吸咗幾啖..而且，見到佢隔籬同行仲有個工人同埋(婆婆/阿嫲)同個哥哥，佢地完全無出聲淨係圍住2個踎咗喺度食煙嘅小朋友同佢(呀爺/呀公)，跟住就走埋一邊話好多人望住！

    我見到小朋友咁嘅反應，我相信佢一定唔係第一次！真係好過分！！

    希望可以幫幫手share到比呢個細路既父母睇到！（記者 區天海）