大埔宏福苑大火其中一名居民家屬今日（12月1日）在社交媒體帖文，指已尋獲家人遺體。文中指該名遇難婦人本可及時逃生，但因掛念鄰居遂逐戶拍門，提醒鄰居走火警，4人1狗因而逃出火場，然而她本人卻錯失逃生的最佳時機，最終返回家中躲避濃煙喪生。家屬強調婦人捨己救人的決定，相信她本人亦感無悔。發文後短短6小時已有近5000人點讚，500多人留言悼念婦人大愛行為。

    帖文：

    奔波幾日，終於有我家人消息，最後位置就喺屋入面，證實遇難。感謝所有關心嘅朋友。由逃生嘅街坊口中間接得知，我通知佢逃走時，佢並唔係即時離開，而佢喺17樓逐家拍門，叫隣居逃生，令致佢延誤逃走時機，最後逃回家中，最後罹難。佢用自己條命，換取4人1 狗嘅生命，佢係貫徹佢嘅做人宗旨。我心情複雜、傷心、難過，但我相信，佢喺果一刻嘅決定，佢係無悔嘅。

    網民留言：

    「RIP 你要繼續加油嚟緊嘅日子！你媽媽手援助人嘅愛，會繼續用另一個方式保佑你！依家有我地大埔人撐住你！」

    「你家人善良而且好勇敢，佢會繼續係天上陪住你，相信佢都希望你地開開心心祝願auntie早日安息，祝願你地以後一直平平安安。」

    「Rip 偉大嘅伯母，你彰顯咗人性嘅光輝」

    「RIP善良的姨姨，帖文者請保重身體。」

    「縱使係生死關頭，你屋企人都展示了人性嘅光輝。」

    「你要撐住呀！當你覺得無助嘅時候，一定要記住佢嘅做人宗旨，將佢嘅精神延續落去。」

    「Auntie 生死關頭最後都勇敢救人，雖然離開左您地，但要以佢為榮，願Auntie早日安息。」（記者 區天海）