大埔康樂園發生爆竊案，事主在社交平台帖文指賊人潛入偷走數十隻手表及飾物，包括父親送贈極具紀念價值的手表，事主已報警，並發文說：「重酬線報」，以失物價值的30%作報酬。

    事主帖文：「各位大埔區街坊留意，琴晚我家不幸被爆竊。琴晚（6月28號）大約8:30pm左右，我喺大埔嘅屋企畀人入屋爆竊。兩個身材瘦削，30至40歲男人，用伸縮梯爬入我屋企。個賊手腳好俐落，趁我出街食飯入屋，留咗10分鐘左右就逃去。偷走咗幾十隻手表同飾物，下面有部分被偷手表嘅相片。其中係我爸爸送畀我人生第一隻手表，意義大過一切金錢。警方都話最近大埔區爆竊多咗，所以除咗報警之外，我都想用網絡力量自救，麻煩大家認住呢兩條友，同時提提大家要小心防範。」

   事主更留言強調「重酬線報」：「我知要搵返嘅機會可能好微，但真心唔想益咗個小偷。如果大家見到有人兜售或carosell 見到來歷不明嘅手表（好似相入面呢幾隻），或者有任何關鍵線索幫到手，知道係咩人所為，我願意畀返尋回物資現價至少 30% 作為報酬 。（你班賊攞啲贓物出去當都應該得兩成啫...）

    「另外，我亦會再捐出多20%去做慈善。就算最後攞唔返，我都想盡力唔好再畀班賊再得手，維持返我哋社區嘅安寧！如果你有任何消息，請即刻DM我或者聯絡大埔警署。求廣傳，萬分感謝大家！」

   警方表示，前日（28日）晚上9時18分接獲一名男子報案，指其與家人外出後，返回位於康樂園的家中發現搜掠痕跡，房門被撬開，經點算損失總值約100萬元的珠寶及手表。警方正追緝兩名賊人，案件列作「爆竊」處理。（記者 區天海）