上水圍廖氏明德堂祭祠。

　　【香港商報網訊】農曆二月的圍村風俗，以春祭最具特色，亦最具睇頭，但莫以為春分日行春祭禮係必然之事，正所謂十里不同風百里不同俗，各處鄉村各處例，新界圍村又何嘗唔係？

　　講起春秋二祭，新界人有兩種演繹，一是指祠祭，即拜祠堂祖先；另一即指拜山，本篇所講的，係祠祭。

　　不一定在春分日進行

　　好多人常想當然的，以為春祭一定在春分日做（二十四氣節之一，在農曆二月某日，呢一日的日夜時間互分，跟住就日漸長夜漸短），兼且古老大族一定有，其實唔係，像新界圍頭大族雖然數來數去不出十來個，但春祭的時間表就因傳承關係，各有不同，互有先後。

　　先說緊隨正日行祭的地方，例子當然最多，我曾到過的，就有屏山鄧氏（四間祠堂或書室分先後行禮）、廈村鄧氏（友恭堂）、屯門陶氏、上村黎氏、山下張氏、錦田鄧氏（大房祠和細房祠同一時間舉行）、上水廖明德堂等。非春分日做的，就有二月初一的龍躍頭鄧氏，二月初二上午10時起祭的粉嶺彭氏和11時起祭的上水圍廖氏（廖萬石堂），初三則有上水廖氏的應龍廖公家塾（顯承堂），到初五還有粉嶺彭氏思德書室。

　　以上都係一些會做春祭的地方，至於唔做的，出乎意料，為數也不少。

　　侯氏文氏家族無辦春祭

　　像同係新界五大家族的侯氏，雖為傳統大族，但由於當年在燕岡的宗祠畀人破?風水，鄉民不得不忍痛放棄，故此合族祭祠便一直冇做過，雖然侯氏在河上鄉、金錢和丙岡都各有家祠，但如今亦冇見祠祭，反而農曆二月十三的洪聖誕，在河上鄉一枝獨秀，成為呢個月村民最重要的民俗活動。

　　另外，文氏家族在新田的一支，人口眾多，亦好重視傳統，但係就只見秋祭沒有春祭（文氏宗祠），原因仍未搞清；而另一支水--大埔泰亨，因為祠堂毀爛了大半世紀，連神主牌都唔全，故此祭務曾被迫停頓?好長的一段日子，及後2005年他們雖排除萬難，在舊地重建文氏宗祠，奈何至今仍未見有復辦之兆。相同的情況在大埔頭鄧氏都一樣，此族雖源出錦田，可講得上係資歷夠條件厚，但村內最大的家祠「敬羅家塾」，亦早早斷咗做春秋二祭的傳統。

　　以上所提到的都是圍頭村，至於客家村行春祭禮，我多年來仍未找到，懷疑已經消失，希望在未來的考察中，能夠有新發現。

　　作者介紹

　　作者：周樹佳

　　曾當編劇記者，如今是香港史地掌故研究者、民俗文化課程導師。著有《香港名穴掌故鈎沉》、《李我講古》系列、《香港民間風土記憶》系列、《香港諸神》等二十餘書。