屯門懷疑發生外賣速遞員盜竊事件。網民在社交網站發布影片，一名外賣速遞員在6月28日下午2時許，到大興花園送外賣後發現另一個單位門外放了一個網購貨物，猶疑一會後竟順手牽羊，將貨件取去。網民指責行為卑劣，並呼籲報警；有關網購供應商亦帖文回應，指可派員工協助到警署報案。

    樓主發文：「代大興花園既街坊Post：尋日俾人偷咗件拼多多，係一個送外賣既阿叔攞左，佢望咗我cam 都幾秒鐘掙紮咗一陣 ，但都依然行過嚟踎低拎咗件拼多多走 。條片希望提醒下各位街坊小心賊仔。」

    其後再帖文指事主回覆：「唔該晒大家，機會其實我俾咗佢 ，我當日即刻聯絡佢同佢公司講咗佢如果原封不動俾返個包裹我嘅，我就當冇呢件事發生過。但佢最後拆曬份件，淨係還返個mon貼俾我 ，另一樣嘢佢話要返屋企摷吓 ，最後一樣就掉咗 。返屋企摷吓係咩意思？就係呢一句，最後我決定報警。我遲吓再update返呢件事，我之後會還原返成件事俾個交代大家，我都知……群情洶湧。」

    派送公司則馬上留言：「街坊你好，我係拼多多送上門屯門供應商，大興花園係我負責嘅地區，如果客人有需要報警，我哋可以安排派送同事同你一齊落口供，我哋亦知道呢個外賣員喺邊度工作，如果有問題，歡迎DM我。」（記者 區天海）